MADIWANI WAMALIZA ZIARA DODOMA, WAJIFUNZA UWEKEZAJI.

Imewekwa: February 13th, 2023

Madiwani wa Halmashauri ya Jiji la Tanga wamerejea Jijini hapa baada ya kuhitimisha ziara yao ya siku nne Jijini Dodoma. Ziara hiyo ilianza kwa wao kuwasili Jijini humo Siku ya Jumatano, Februari 08, 2023.

Wakiwa Jijini Dodoma, walianza ziara yao katika Halmashauri ya Jiji la Dodoma kwa kupokelewa na Naibu Meya wa Jiji hilo, Mhe. Jamal Ngalya ambaye ni Diwani wa Kata ya Kizota, na Mkurugenzi wa Jiji, Bw, Joseph Mafuru, na baadhi ya wataalamu wa Halmashauri hiyo.

Baada ya mapokezi hayo, Waheshimiwa Madiwani walipokea taarifa ya utekelezaji wa miradi mikubwa mitano ya kitega uchumi inayotekelezwa kwa fedha za mapato ya ndani, na mradi mkubwa wa barabara ya mzunguuko (ring road) unaotekelezwa na fedha za Serikali Kuu, kutoka kwa Mkurugenzi wa Jiji la Dodoma Bw. Joseph Mafuru, ambapo miradi hiyo, inatarajiwa kuwa vyanzo vya mapato kwa Halmashauri hiyo.

Miradi iliyotembelewa na Waheshimiwa Madiwani katika ziara hii, ilihusisha:

1. Ujenzi wa Jengo la kitega uchumi katika eneo la Mtumba (Mtumba Complex) ambapo ujenzi huu unafanyika kwa awamu mbili. Awamu ya kwanza ni ujenzi wa jengo la hotel ya ghorofa 5 na kumbi za mikutano 7, kati ya hizo ukumbi mmoja mkubwa ukiwa na uwezo wa kuchukua watu 1000 kwa wakati mmoja, Gharama za mradi huu zikiwa ni shillingi Billion 59.3.
2. Ujenzi wa soko la wazi la Machinga (Machinga Complex) mradi umekamilika na umegharimu zaidi ya shillingi Billion 9.5, ambapo fedha za mapato ya ndani zikiwa ni shillingi Billion 6.5 huku zaidi ya Machinga 3,000 wakiingia na kufanya biashara zao kwa uhuru.
3. Mradi wa stendi kuu ya mabasi kujifunza namna Halmashauri inavyoendesha Jengo la Kitega Uchumi la stendi hiyo. Stend hiyo inapokea wastani wa mabasi 300 hadi 350 kwa siku na hutoa huduma mbalimbali kama ukodishaji wa kumbi, kulaza mabasi, magari binafsi, n.k.
4. Waheshimiwa Madiwani waliweza kujionea mradi wa Hotel - Dodoma City Hotel, inayomilikiwa na Halmashauri hiyo, yenye vyumba vya kulala 85, ambapo mradi huo umegharimu kiasi cha shillingi Billion 11.9 na tayari imepata mwendeshaji.
5. Mradi wa Ujenzi wa Shule ya mchepuo wa Kiingereza – Msangalalee English Medium Primary School, iliyoanza mwaka huu, 2023.
6. Mradi mkubwa wa ujenzi wa barabara ya mzunguuko (Ring Road) unaotekelezwa kwa fedha za Serikali Kuu kwa gharama ya shilling Billion 300.

Siku ya Ijumaa, February 10, 2023, Waheshimiwa Madiwani walihudhuria kikao cha Bunge kwa mwaliko wa Mbunge wa Jimbo la Tanga Mjini, na Waziri wa Afya, Mhe. Ummy Mwalimu ambapo walipata nafasi ya kujifunza shughuli za uendeshaji wa vikao vya Bunge, na kusikiliza Hotuba ya kuhairisha Bunge iliyosomwa na Waziri Mkuu wa Tanzania, Mhe. Kassim Majaliwa.

Baada ya kuhairishwa kwa Bunge, Madiwani wa Jiji la Tanga walipata nafasi ya kusalimiana na Waziri Mkuu, Mhe. Kassim Majaliwa na baadhi ya Mawaziri na Wabunge, na baadae wakiwa na Mhe. Ummy Mwalimu, walifanya vikao vya kimkakati na Mawaziri Mh. Mashimba Ndaki, Waziri wa Mifugo na Uvuvi, na Mhe. Dkt. Anjelina Mabula, Waziri wa Ardhi na Maendeleo ya Makazi.

Katika kipindi chote cha ziara hii, Mbunge wa Jimbo la Tanga Mjini ambaye pia ni Waziri wa Afya, Mhe. Ummy Mwalimu (Diwani kwa nafasi yake kama Mbunge) aliungana na Madiwani wenzie wa Jiji la Tanga katika muda wote wa ziara ikiwemo kuwezesha itifaki za Bungeni.