AKIDAYA WANUFAIKA NA MIKOPO YA HALMASHAURI

Imewekwa: March 22nd, 2023

Diwani wa Kata ya Chumbageni Jijini Tanga, Mhe. Ernest Kimaya amekabidhi BAJAJ mbili mpya kwa kikundi cha AKIDAYA kinachoundwa na Ndg. Akida Addy na Bi. Hidaya wa Kata ya Chumbageni ambao ni wanufaika wa mikopo ya asilimia 10 inayotolewa na Halmashauri kwa makundi ya Wanawake, vijana na watu wenye ulemavu, wao wakiwa katika kundi la watu wenye ulemavu.

Kikundi cha AKIDAYA kimepata mkopo wa Tsh. 18,000,000.00 na kununua Bajaj hizo kwa lengo la kuzitumia kwa shughuli za usafirishaji wa abiria ili kuweza kujiingizia kipato, na kwa njia hiyo wametoa ajira kwa vijana madereva watakao kabidhiwa kuziendesha.

Kikundi hiki cha watu wenye ulemavu, sio cha kwanza kupata Bajaj katika Kata ya Chumbageni, huu ni muendelezo wa jitihada za Diwani wa Kata pamoja na Maafisa katika Ofisi ya Kata hiyo, kwa kushirikiana na Mbunge wa Jimbo la Tanga Mjini, Mhe. Ummy Mwalimu katika kuendelea kuibua, kuelimisha, kuhamasisha na kuwezesha makundi ya wanawake, vijana na watu wenye ulemavu kuchangamkia fursa ya mikopo ya asilimia 10 ya mapato ya ndani ya Halmashauri inayotolewa na Serikali ya Rais Dkt. Samia Suluhu Hassan.