Afisa Elimu wa Jiji la Tanga Khalifa Shemahonge amewataka Wasimamizi wa mitihani ya darasa la saba kuzingatia maadili ya kazi

Imewekwa: September 10th, 2019

Afisa Elimu Msingi wa Halmashauri ya Jiji la Tanga Ndugu Khalifa Shemahonge ametoa rai  kwa walimu ambao watahusika kusimamia mitihani ya darasa la saba inayotarajiwa kuanza siku ya jumatano  na kumalizika Alhamisi kusimamia maadili ya kazi kwa kuzingatia taratibu,kanuni na sheria za  mitihani ili kupata wataalamu ambao watalijenga taifa .

 Mwalimu Shemahonge ameitoa rai hiyo  alipokuwa akizungumzia maandalizi ya mitihani ya darasa la saba  amesema Halmashauri ya jiji la Tanga ina jumla  ya shule 100 ambapo shule 21 Binafsi na za serikali 79 ambazo zitafanya mitihani ya kuhitimu elimu ya msingi huku idadi ya wanafunzi ambao wamesajiliwa kufanya mtihani 7401,wasichana 3875 na wavulana ni 3526.

“Mimi nitoe rai kwa walimu watakao simamia mtihani bila shaka wamepewa maelekezo vizuri kikubwa wazingatie taratibu za mitihani lakini pia nidhamu ya kipekee nishauri walimu husika wawe makini kwa sababu wanatengeneza maisha ya watu pamoja na Taifa la kesho hili  eneo  ni muhimu sana ambalo ni lazima wawe makini “Amesema Afisa Elimu  wa Halmashauri ya Jiji la Tanga Khalifa Shemahonge.

Pia  ametoa wito kwa wanafunzi wanaofanya mitihani hiyo kumshirikisha mwenyezi mungu kwa kuomba Dua na Sala mbalimbali kila mtu kwa dini yake kwani mtihani wanaoufanya ni kama mazoezi ya darasani kwani hamna kitu kigumu vyote wamesoma madarasani  .

Aidha Shemahonge amepongeza juhudi za Mkuu wa Mkoa wa Tanga za  kuwataka wanafunzi ambao wapo kwenye Madarasa ya mitihani kuwa kwenye makambi jambo ambalo litasaidia kuongeza ufaulu kwa mwaka huu ukilinganisha na miaka ya nyuma .

“Tunatekeleza haya maelezo ya  Mkoa au maadhimio ya kikao cha Handeni ,Mwezi wa sita wakati wa likizo wanafunzi wote walisoma ,walikaa kambi  na walikula mchana  tumekuwa tukifanya tathimini kila wiki katika kipindi cha kambi na hatujaacha mpaka mwisho kuweza kuangalia kwamba matokeo yalibadilika, kwa mapenzi ya mungu tunatarajia matokeo ya mitihani hii yatakuwa mazuri zaidi.”Amesema Afisa Elimu wa Halmashauri ya Jiji la Tanga Khalifa Shemahonge

  Darasa la saba  wanatarajia kuanza mitihani yao ya kuhitimu elimu ya msingi  siku ya  Jumatano na Alhamis  ya  tarehe 11,12 mwezi huu ,hivyo tunapaswa kushirikiana vyema kuwaandaa watoto wetu ili waweze kufanya vizuri katika mitihani yao.

                                                                                                                                         Afisa Elimu Msingi wa Halmashauri ya Jiji la Tanga Ndugu Khalifa Shemahonge 

                                                                                     akitoa rai kwa wasimamizi wa mitihani ya Darasa la sabaJjijini Tanga.