ONDOSHENI MIFUGO KATIKATI YA JIJI

Imewekwa: October 29th, 2022

Mstahiki Meya wa Jiji la Tanga Mhe Abdulrahman Shiloow amewataka watendaji wa kata kwa kushirikiana na watendaji wa mitaa, kuhakikisha wanaondoa mifugo inayozagaa na kuzurura ovyo katika maeneo yao na kuihamishia pembezoni mwa mji ili kuhakikisha sheria ya majiji inazingatiwa.

Mhe shiloow amesema hayo katika mkutano wa baraza la madiwani la kupokea taarifa za kata uliofanyika katika ukumbi wa halmashauri.

“Kata ya Makorora, Mzingani mifugo inazurura tu, Watendaji mtusaidie mkashirikiana na watendaji wa mitaa kuhakikisha mifugo inayorandaranda mitaani na kuharibu bustani za watu mnaikamata na kuipiga faini” amesema Mstahiki Shiloow

Naye Mkurugenzi wa Jiji la Tanga Dkt Sipora Liana ameongeza kwa kusema kuwa Jiji halihitaji mifugo inayochungwa.

“Tunahitaji mifugo inayofugwa ndani, hatuhitaji kuchafuliwa mazingira. Watendaji simamieni maeneo yenu, kamateni mifugo mkishindwa tutawapiga nyie faini “ amesisitiza Dkt. Liana.